Tíminn líður hratt

og enn styttist í förina :)

Í dag fórum við Sigga í leiðangur og sóttum gjafir frá fyrirtækjum sem við vorum búnar að tala við. Eirberg gaf okkur 4 kassa (1000 stk í hverjum) af einnota hönskum og einn poka með grisjum. Vistor gaf okkur svo 2 kassa fulla af góðgæti, m.a. hlustunarpípur, blóðsykursmæli, maska, svuntur, sloppa og sáraumbúðir. Síðan fórum við á Slysó þar sem safnað hafði verið fyrir okkur alls konar dóti, en við ætlum að fara aðeins yfir það og sjá hvað við teljum að hægt sé að nota í Kenýa. Erna tannlæknanemi hitti mig síðan, en hún komst að því þegar hún var úti, að á einni stöðinni er fullbúinn tannlæknastóll. Hann kemur hins vegar að litlum notum þar sem stöðin á ekkert tannfyllefni. Hún var nú ekki lengi að redda því og ætlar að senda með okkur fullt fullt af amalgami sem er silfurtannfylliefni.
Svo fór ég í apótek og keypti lyfin okkar, malaríulyf og ýmis sýklalyf, auk þess sem ég keypti augndropa og verkjalyf til öryggis.
Sem betur fer erum við búnar að fá aukna farangurheimild frá Icelandair, en sennilega verðum við að borga eitthvað hjá Kenya-Airlines þar sem þeir neituðu okkur um svoleiðis.

Jæja, ég ætti nú frekar að vera að skrifa ritgerð en að skrifa á bloggið, en ég mátti til með að segja frá þessu :)

Minna en vika.....

þar til við förum út.
Já nú er þetta bara að bresta á. Næsta laugardag fljúgum við út, fyrst til London og svo til Nairobi, verðum komnar þangað á sunnudagsmorguninn. Vá, hlakka ekkert smá til og bara eitt smá próf eftir á miðvikudaginn.
Mikið af styrktarpeningnum er kominn í hús, en ekki allt samt og svo erum við líka búnar að fá e-r hjálpargögn gefins sem við förum með út, eigum samt eftir að sækja þau og pakka niður.

Vaka er að fara að flytja 3. árs verkefnið sitt í vikunni - þú rúllar því upp stelpa, gangi þér vel!
Já, þetta er ss bara allt að hafast hjá okkur stöllunum :)

Það styttist

Já það styttist í ferðina, ég setti upp niðurteljara hér til hægri, en hann sést reyndar bara í Internet explorer hjá mér, ekki í Firefox. Samkvæmt teljaranum eru bara 17 dagar í að ævintýraför okkar hefjist!

Tannlæknastelpurnar eru komnar til Nairobi, það er hægt að fylgjast með þeim á www.blog.central.is/kenya2006

Svo rakst ég á aðra síðu hjá strák sem var hálft ár í Kenýa, en er kominn heim núna, ég skellti nokkrum sinnum upp úr þegar ég las síðuna hans. Verst að hann fékk einhverja eosinophil ormasýkingu í lungun og læknarnir hérna vissu ekkert hvað það var, heldur hafði hann samband við lækninn sinn í Kenya sem sagði honum hvaða lyf hann ætti að taka, en þau lyf fást ekki hér. Vona að hann fá þau og lagist drengurinn. Ef einhver hefur áhuga á að lesa bloggið hans, þá er það hér.

Annars erum við stelpurnar á fullu í skólanum, Árdís og Sigga eru að fara í próf í þessari viku, verklegu prófin í medicine og kirurgiu. Ég er á fullu að skrifa ritgerðina mína, mér miðar ágætlega en þarf samt að vera á undan áætlun þar sem við förum út áður en skilafresturinn rennur út, og því þarf ég að skila fyrr.

Myndin að ofan er af Kenýskum 100 skildinga seðli, sem samsvarar um 100 kr íslenskum. Við þurfum víst að hafa varann á, því mikið er um falsaða peninga og maður getur lent í klípu ef maður er vís að því að borga með þeim. Jakkinn sem kallinn er í á að vera hrufóttur og svo er eitthvert vatnsmerki líka sem á að aðgreina alvöru peninga frá fölsuðum.

Gangi ykkur vel í prófinu á morgun stelpur,
kveðja, Vaka :)

halló......

já, það styttist alltaf meir og meir í Kenya ferðina okkar - ekki það að það sé mikill tími fyrir tilhlökkun eða undirbúning á þessum síðustu og verstu tímum.....
Því nú eru það blessuð prófin - og ekkert rosa mikill afgangs tími til umráða- eða það er bara enginn tími, reyndar....því verknámið er jú líka í fullum gangi frá 8-16, alla daga, alltaf!!!!
Fyrsta prófið mitt er einmitt eftir viku (16maí), en það er stöðvaprófið í medicin (verklegt og munnlegt) og svo er verklega kirurgiu prófið þann 19. maí - daginn eftir undankeppnina í Eurovision.
Í næstu viku er líka síðasta vikan í verknáminu - ég held ég eigi nú eftir að sakna spítalans soldið og veit ekki hvað ég á að gera við allan tímann sem vinnst þegar það verður búið!! Þá fáum við líka alveg heila viku fyrir skriflega medicin og bara ekkert verknám á meðan, maður verður nú bara í sundi og e-u afslappelsi þá.....
Jæja, þetta er komið gott af skólamálum í bili - verður snilld þegar það allt verður búið og bara Afríka sem bíður - maður hefur þó alltént e-ð að hlakka til, sem er kostur - mikill kostur:)

Lifið heil - og njótið veðurblíðunnar (þið sem hafið tíma til að vera úti...) og allir hinir njótið þess bara að horfa út um gluggann....

Ferðamannaniðurgangur

• Um 50% ferðamanna til þróunarlanda fá niðurgang
• 5-10% ferðamanna fá niðurgang sem stendur í 2 vikur eða lengur
  
• 1-3% fá niðurgang sem stendur yfir í mánuð eða lengur
  
• Algengasta orsök er E. coli
• Aðalsmitleiðir eru menguð matvæli og/eða drykkjarvatn - (fecal/oral)

• Forvarnir:
• borða bara vel soðinn eða steiktan mat
• drekka bara vatn sem hefur verið soðið eða vatn úr flösku

• Mikilvægasta meðferðin er að fá nógan vökva
• Ekki er mælt með sýklalyfjum nema ef: hiti, blóðugur niðurgangur, gröftur eða áhættuhópar
• Stemmandi lyf (Loperamíð, Imodium)
• ekki nota ef hiti, blóð, slím í hægðum
• forðast notkun lengur en í 48 klst.
• getur dregið einkenni á langinn ef um sýkingu er að ræða

Vá hvað ég er farin að hlakka til að fara út - og ekki skemma svona upplýsingar fyrir!!!
50% sem fá niðurgang - jess!! Ég ræð nú kannski við það, en ég veit ekki hvernig ég verð ef ég er ein af þessum 5-10% sem fá niðurgang í 2 vikur eða lengur!!! OG hvað þá ef við erum að tala um mánuð!!
Ég er ss í því núna að lesa um smitsjukdóma og rakst á þessar haldbæru og góðu upplýsingar hjá honum Magnúsi Gottfreðs smitlækni.
Margar gagnlegar upplýsingar að finna í glósunum hans. Hann kom td inn á það að margir ferðamenn taka áhættur í kynlífi - og nefnir mikilvægi þess að upplýsa ferðamenn um áhættu og forvarnir, það er því best að ég ræði við stelpurnar fljótlega, svo þær hagi sér nú skikkanlega.....og ég ætla líka að biðja þær um að vera ekki að standa í því að fá sér tattoo þarna úti......

Vaka

Best að pósta inn mynd af mér hérna líka, held meira að segja að þessi mynd sé tekin sama kvöld og myndin af Siggu og Árdísi, á árshátíð Félags læknanema.

Annars er ég að jafna mig í upphandleggjunum, var svolítið aum báðu megin eftir 2 sprautur í sitthvorn handlegg. Enginn hiti farin að láta á sér kræla, vonum að hann sleppi því bara að mæta.

Kv. Vaka

Sigríður og Árdís

Fyrir þá sem ekki vita þá erum þetta við - þe Sigríður 4.árs læknanemi og Árdís (ég) líka 4.árs nemi og svo er það auðvitað hún Vaka sem er að fara með okkur (til Kenya) - hún er á 3ja ári og hlýtur að fara setja mynd af sér hingað inn. Hún er mjög sæt og þarf ekkert að skammast sín, svo er líka frekar stutt síðan hún fór í klippingu....
Við Sigríður erum búnar að sitja saman hér hjá mér í kvöld (og Þorri og Snorri) og spjalla um strendur og safarí í Kenya og erum orðnar yfirspenntar!!!
Því nú er farið að styttast allsvakalega í brottför - rétt rúmur mánuður og bara nokkur próf sem þarf að klára svona upp á punt....

Við fórum í gær til Helga Guðbergs og hann sprautaði hinum ýmsu bóluefnum í okkur; gegn yellow fever, Havrix (lifrarbólga A), Typherix (taugaveik) og Mengevax (heilahimnubólga). Svo fengum við heim með okkur bóluefni gegn kóleru sem við eigum að drekka á fastandi maga, þurfum svo að fá annan skammt af því eftir ca. hálfan mánuð, þá fáum við líka DiTeKi Pol (barnaveiki, kíghósti, stífkrampi og lömunarveiki).
Á næstu 10 dögum getum við búist við því að fá allt að 40° hita í 1-3 daga, vegna bóluefnisins gegn yellow fever - en það er nú vonandi að við sleppum við það, því það kemst bara ekki fyrir í prógramminu....

Vá vá vá :)

Styrkjasöfnunin gengur eins og í lygasögu :)

KB-banki var að berast í hóp styrktaraðila, frábært alveg hreint. Það lýtur út fyrir að við munum eiga eftir góða summu til að kaupa eitthvað þarna úti, eitthvað svona stórt sem þörf er á.

Annars var ég að heyra frá honum Eyjólfi sem fór út í fyrra. Það er víst ekki enn búið að opna HIV-heilsugæsluna sem þau gáfu hluti í, því húseigandinn heimtar að þau flísaleggi gólfið áður en hann gerir við göt í veggjum og slíkt. Samtökin hafa því miður ekki efni á flísunum enn, svo ekki hefur tekist að opna heilsugæsluna. Vonandi verður hægt að finna lausn á þessu svo að stöðin komist í gagnið.


Glaxobóluefnin eru að berast í hús og ætlum við að fara með þau til Helga Guðbergs og fá ráðleggingar um hvernig er best að hafa röðina á þessum bólusetningum.

Set inn link á tannlæknanemana sem eru að fara út, þær fara út um miðjan maí og fara heim um svipað leyti og við komum.

Bless í bili,
Vaka

ps. það væri gaman ef þið sem kíkjið á síðuna mynduð skilja eftir komment svo við sjáum hverjir eru að skoða :)

Allt að fara að gerast

Styrkjasöfnun gengur vel, bæði peningar og gjafir safnast á fullu.
Erum komnar með styrk frá Actavis group, Læknafélagi Íslands og svo ætlar Eirberg að gefa okkur einhverjar vörur, en við eigum eftir að tala betur við þá.

Loksins erum við að fá bóluefnin frá Glaxo, en það er búið að vera smá þraut að finna út hvernig má afgreiða lyfseðilsskyld lyf út ókeypis, en það er allt komið í góðan farveg og við getum sótt þau í dag í apótek LSH, með lyfseðli að sjálfsögðu.

Á morgun förum við svo til Helga Guðbergs á Heilsuverndarstöðina, en hann er víst algjör sérfræðingur í ferðamannabólusetningum, enda ekki hlaupið að því að fá tíma hjá honum. Þar fáum við Yellow fever bólusetninguna, en aðeins 3 menn á landinu hafa leyfi til að bólusetja gegn Yellow fever; Helgi, Haraldur Briem sóttvarnarlæknir og einn læknir á Akureyri. Svo þurfum við fá Havrix (lifrarbólga A, Typherix(taugaveik) og DiTeKi Pol (barnaveiki, kíghósti, stífkrampi og lömunarveiki) og malaríulyf. Við ætlum líka að taka með okkur alls konar sýklalyf, gegn öllum mögulegum sýkingum, niðurgangs-stopp-pillur, augndropa, semperduft og fleira, því betra er að vera við öllu búin.

Fyrsta færslan

Við erum 3 stúlkur sem erum allar læknanemar við Háskóla Íslands,
Vaka á 3. ári
Árdís á 4. ári og
Sigga á 4. ári

og við erum að fara til Kenýa í byrjun júní, nánar tiltekið til Nairobi í "slummin". Þar eru reknar nokkrar heilsugæslustöðvar á vegum samtaka sem kallast Provide International, þar sem læknisþjónusta er ókeypis (en borga þarf lágmarksverð fyrir lyf).

Við erum byrjaðar að safna styrkjum til fararinnar, og erum nú þegar komnar með styrki frá Félagsstofnun stúdenta, VÍS, Landsneti og Atlantsskipum, auk þess fáum við bóluefni og lyf frá GlaxoSmithKleine. Auk þess höfum við sent út fleiri beiðnir, sem við bíðum spenntar eftir að fá svör við.

Í næstu viku erum við svo að fara til Helga Guðbergs á Barónsstígnum að fá bólusetningu gegn Yellow fever (mýgulusótt) og að fá leiðbeiningar um malaríuvarnir o.s.frv.